Спорт – жай ғана ойын емес: ол босқындар мен қауымдастықтарды біріктіретін көпір

Спорт әрдайым шекаралардан, мәдениеттер мен тілдерден асып түсетін әмбебап тіл болды. Ол әлемнің түкпір-түкпірінен миллиондаған адамдарды біріктіріп, көптеген адамдар үшін тек ойын емес – құмарлықты, өзін-өзі таныту мен байланысудың ерекше тәсіліне айналды.

Фарух , DAFI бағдарламасы бойынша Қазақстанда стоматология мамандығына оқитын жас босқын – қатысушылардың бірі.

«Мен футболды бала кезімнен жақсы көремін», – дейді Фарух. «Бұл жай ғана хобби емес, бұл менің кім екенімнің бір бөлігі, өзімді білдірудің және шынайы қуаныш табудың жолы».

Қазақстанда 120-дан астам этнос өкілдері өзара сыйластықта өмір сүріп жатыр. Сондай-ақ мұнда 2025 жылдың қаңтарындағы жағдай бойынша 646 босқын мен пана іздеуші тұрады. Олар жергілікті тілдерде сөйлейді, азаматтармен туыстық байланыста болады және мәдениет пен күнделікті өмірге араласып, қоғамдастықтармен үйлесімді өмір сүреді.

Бейбітшілікте бірге өмір сүрудің халықаралық күні қарсаңында босқындар, пана іздеушілер мен жергілікті қауымдастықтар ынтымақтастық, бірлік пен үмітті ұлықтаған екінші «Бейбітшілік ойындары» футбол турнирінде бас қосты.

«Бұл турнир «Бейбітшілік ойындары» деп аталады және ең алдымен барлық елдер мен халықтарды біріктіреді», – дейді Фарух. «Барлығы бір топ болып, бірлік пен достықта ойнау үшін жиналады».

Қазақстан футбол федерациясы, UNHCR, БҰҰ–ның Босқындар істері жөніндегі агенттігі, Қазақстан Республикасы Қызыл Жарты Ай Ұлттық қоғамы және УЕФА-ның босқындар гранты бағдарламасының қолдауымен өткен бұл шара спорттың қоғамды біріктірудегі қуатты құрал екенін тағы бір мәрте дәлелдеді.

Алты команда тек жеңіс үшін емес, ортақ мақсат жолында күш сынасты. «Бейбітшілік ойындары» спорттың адамдарды жақындастырып, өзара түсіністік пен ынтымақтастық көпірін құра алатынын тағы бір мәрте көрсетті.

Қазақстандағы екінші «Бейбітшілік ойындары» футбол турнирінің «Үздік қорғаушысы» Фарух пен Қазақстан футбол федерациясының әлеуметтік және тұрақты даму жөніндегі офицері Чингиз.

Қазақстандағы алғашқы «Бейбітшілік ойындары» футбол турнирінің жеңімпаздары.

«Алаңдағы сезімдерді – адреналиннен бастап командаңа деген шынайы жанкештілікке дейін – камерамен де, сөзбен де толық жеткізу мүмкін емес», – дейді Фарух. «Мен әркімнің осы сезімді бастан кешіргенін қалаймын: бәсекелестіктің қызуы, толқу және ойынның шынайы қуанышы».

«Мен әркімнің осы сезімді бастан кешіргенін қалаймын: бәсекелестіктің қызуы, толқу және ойынның шынайы қуанышы».

Орталық Азияда көктемнің, жаңарудың және жаңа бастамалардың символы саналатын Наурыз мейрамы аясында өткен турнир алғаш рет ұйымдастырылған «Бейбітшілік ойындарының» үлгісінде өтті.

Турнирмен қатар төрешілер мен жаттықтырушыларды даярлау курстары да ұйымдастырылды. Ол курстарға он үш босқын, оның ішінде екі әйел қатысып, арнайы сертификаттарға ие болды. Бұл бастамалар спорт арқылы ұзақ мерзімді ықпалдастықтың жаңа мүмкіндіктерін ашып, қатысушыларды маңызды дағдылар мен біліммен қамтамасыз етті.

© Kazakhstan Football Federation / Alikhan Sariyev

Бүгінде әлем мәжбүрлі қоныс аударудың өсуімен бетпе-бет келіп отыр. Осындай кезеңде «Бейбітшілік ойындары» секілді бастамалар футбол сияқты қарапайым ойынның өзі адамдарды біріктіріп, кедергілерді жойып, достық пен бейбіт өмірге жол ашатынын айқын көрсетеді.

UNHCR Қазақстан Үкіметімен бірлесіп, босқындар мен пана іздеушілердің жай ғана қауіпсіз панамен шектелмей, қоғамда өз орнын тауып, толыққанды өмір сүріп, дамуына мүмкіндік жасауға қолдауын жалғастырып келеді.

Спорт – жай ғана ойын емес: ол босқындар мен қауымдастықтарды біріктіретін көпір

Сондай-ақ қараңыз

Интеграцияланған, бірақ әлі де Қазақстанда инклюзивтікті іздеуде

«Енді менде үміт бар»

Тіл: Босқындарды интеграциялаудың көпірі