Croeso Mawr i Brydain

‘Mae Manceinion mor groesawus. Mae’r cymunedau yma yn eich croesawu heb feddwl o ble rydych yn dod.’

Mahboobeh

Artist, Cynhyrchydd a chyn Gynhyrchydd Creadigol yn CAN

Mae Gŵyl Horizons, sy’n cael ei chynhyrchu gan Community Arts Northwest (CAN), ac sydd wedi’i lleoli yn HOME ym Manceinion, yn arddangos amrywiaeth y ddinas drwy wahodd pobl i gysylltu, dysgu, sefyll gyda’i gilydd a rhannu traddodiadau a thalentau pobl sydd wedi cael eu gorfodi i ffoi ac sydd bellach yn gwneud eu cartref ym Manceinion. Yn yr ŵyl fe wnaeth Mahboobeh, ffoadur o Iran, a arferai fod yn Gynhyrchydd Creadigol yn CAN, berfformio cerdd i Fanceinion, sy’n dathlu’r ddinas sydd wedi’i chofleidio fel un o’i phobl ei hun. Menyw ifanc yn ceisio lloches oedd Mahboobeh, ac fe wnaeth menywod CAN ei chroesawu â breichiau agored, ei chefnogi a dod yn fodelau rôl iddi.

‘Mae Oasis yn ail deulu i mi ac yn lle diogel i mi. Mae’n lle i mi.’

Alis

Rheolwr Arlwyo yn Oasis Caerdydd

Mae Alis yn dod o Honduras a daeth i’r DU yn 2019 i geisio lloches gyda’i deulu. Dechreuodd wirfoddoli yng nghegin Canolfan Oasis yn fuan ar ôl cyrraedd Caerdydd, ac yn nes ymlaen cafodd ei gyflogi gan y Ganolfan i redeg tryc bwyd Global Eats, sydd bellach yn dod â dulliau coginio Lladinaidd i gymuned Sblot dair gwaith yr wythnos ac sydd wedi bod yn ymwelydd cyson â gŵyl gerddorol Y Dyn Gwyrdd.

‘Canu, bod mewn hwyliau da, bod yn hapus – mae fy nghalon ar agor, mae’n beth da i agor ein calonnau.’

Anja

Aelod o Gôr Dinasyddion y Byd a Rheolwr Prosiect

Mae Côr Dinasyddion y Byd yn disgrifio ei hun fel teulu cerddorol sy’n dathlu celfyddyd, treftadaeth a charedigrwydd pobl sy’n ceisio noddfa a’u cefnogwyr. Sefydlwyd y côr gan Becky Dell a Tess Berry-Hart, ac mae’n gyfuniad unigryw o bobl na fyddent wedi dod at ei gilydd fel arall o bosibl. Maen nhw’n cyfarfod unwaith yr wythnos i ganu a rhannu eu profiadau. Mae Anja o Wcráin ac Aref o Afghanistan yn ffoaduriaid sydd wedi darganfod cymuned, cyfeillgarwch a chysur drwy ganu yn y côr. Mae Côr Dinasyddion y Byd wedi perfformio yng Ngŵyl Glastonbury ac wedi cael eu sioe eu hunain yn y Barbican.

‘Rydw i wrth fy modd yn dringo, mae’n fy ngwneud i’n hapus.’

Amir

Aelod o Refugees Rock

Mae Amir, o Iran, ac Olivia o Nottingham yn dringo gyda’i gilydd yn rheolaidd yn The Climbing Hangar yn Lerpwl. Daethant yn ‘fydis bowldro’ sy’n cefnogi ei gilydd pan maen nhw ar y wal a phan maen nhw â’u traed ar y ddaear drwy Refugees Rock, sesiynau di-dâl misol The Hangar sy’n paru ceiswyr lloches a ffoaduriaid ag aelodau Hangar. Mae’r sesiynau’n cael eu cydlynu gan ddringwyr brwd o nifer o sefydliadau sy’n gweithio gyda cheiswyr lloches, ac mae pobl sydd wedi cael eu gorfodi i ffoi yn cael eu croesawu i gymuned sy’n ymfalchïo ei bod yn hybu cynhwysiant, ymddiriedaeth ac ymdeimlad o berthyn, ynghyd â hybu iechyd corfforol a meddyliol.

‘Yn fyr, rydw i wedi darganfod teulu.’

Syed

Actor, Hwylusydd ac Ymddiriedolwr yn Phosphorus Theatre

Mae Syed, o Afghanistan, yn rhannu ei dalent fel actor gyda Phosphorus Theatre ac yn sôn am y profiad o ffoi o’i gartref a theithio i’r DU ar ei ben ei hun yn 14 oed. Ddeng mlynedd ar ôl ymuno â chymuned celfyddydau perfformio Phosphorous, mae bellach yn helpu aelodau newydd fel Ismael i fynd ar y llwyfan ac ymgartrefu yn y DU. Mae Syed yn paratoi i ddechrau gyrfa newydd fel peiriannydd ac mae Ismael ac yntau’n dweud eu bod wedi darganfod cefnogaeth ar y llwyfan ac oddi arno yn Phosphorus Theatre.

‘Rwy’n hoffi popeth am yr ysgol yma. Mae hwyliau da iawn arna i pan fydda i’n mynd i’r ysgol.’

Denys

Disgybl o Wcráin yn Ysgol Iau Avenue

Mae Denys, ffoadur o Wcráin, yn setlo’n dda yn Ysgol Iau Avenue â chymorth Saeedah, sy’n gymhorthydd dosbarth yno. Roedd Saeedah yn arfer bod yn bennaeth ysgol yn Iran, ond roedd hi’n methu â chael gwaith fel athrawes yn y DU. Rhoddodd Ysgol Iau Avenue, sy’n rhan o’r rhwydwaith Ysgolion Noddfa yn Norfolk, gyfle iddi gael profiad er mwyn ailddechrau ei gyrfa. Mae profiad Saeedah o ddadleoli yn helpu myfyrwyr fel Denys i ddarganfod cefnogaeth a theimlad o berthyn, ac yn ei helpu i ddatblygu mewn hyder a chael y budd mwyaf o’i addysg mewn cartref newydd.

‘Rwy’n gallu dod i’r ward yma a siarad gyda phawb a gweithio gyda phawb. Rwy’n gallu gofyn am gymorth unrhyw bryd.’

Kismat

Nyrs Plant yn Ysbyty Brenhinol Bradford

Mae teulu Kismat yn Rohingya o Myanmar ond cafodd hi ei geni yng ngwersyll ffoaduriaid Nayapara yn Bangladesh ar ôl i’w theulu gael eu gorfodi i ffoi o’u cartref. Cafodd ei hadsefydlu yn Bradford gyda’i theulu yn 2009, lle dysgodd Saesneg yn fuan iawn a dod yn aelod gweithgar o’i chymuned leol. Oherwydd ei hawydd i helpu teuluoedd a gofalu am blant, fel y cafodd ei theulu hi ei helpu, dechreuodd Kismat ymddiddori mewn astudio Nyrsio Plant. Erbyn hyn mae wedi dechrau gweithio fel Nyrs Staff yn Ysbyty Brenhinol Bradford.

‘Dywedodd Wafa wrthyn ni, “Mae angen i chi ymarfer eich Saesneg. Rwy’n gwybod am fan lle gallwch chi gynnig helpu yn rôl gwirfoddolwyr.”’

Hanan

Gwirfoddolwraig mewn siop elusen

Mae Wafa, sy’n wreiddiol o Qamishli, Syria, bellach yn byw gyda’i dau fab yn nhref fechan Rothesay ar Ynys Bute yn yr Alban, lle cawsant eu hadsefydlu yn 2021. Mae Cyngor Argyll a Bute, y Cyngor y mae tref Rothesay wedi’i lleoli ynddo, wedi bod yn adsefydlu teuluoedd o Syria a theuluoedd ffoaduriaid eraill er 2015, gan gynnwys ffoaduriaid sydd wedi cyrraedd yn fwy diweddar fel Hanan a Sumaia o Darfur yn Sudan. Mae Wafa wedi bod yn helpu Hanan, Sumaia ac eraill drwy, er enghraifft, eu cyflwyno i siop elusen Oxfam lle mae hi’n gwirfoddoli.

‘Mae gweithio gydag Abdullah yn golygu bod gyda rhywun sy’n deall beth rydw i wedi bod drwyddo.’ Abdisa

Rheolwr Stondin Marchnad ym Mharc Victoria

Hanner ffordd drwy ei swydd chwe mis fel Rheolwr Marchnad ar gyfer stondin Breadwinners ym Mharc Victoria, dechreuodd Abdullah hyfforddi Abdisa i gymryd y rôl drosodd. Yn ogystal â chael profiad gwaith gwerthfawr, sydd wedi helpu Abdullah i gael gwaith mewn becws lleol, mae’r rhaglen yn cynnig cyfle i bobl weithio gyda phobl ifanc eraill sydd wedi profi dadleoli dan orfod a chyrraedd y DU ar eu pen eu hunain. Mae Breadwinners yn elusen a menter gymdeithasol sy’n cynnig rhaglenni i geiswyr lloches a ffoaduriaid sy’n caniatáu iddynt gael profiad ymarferol o redeg busnes. Mae pob person ifanc yn cael ei baru â mentor gwirfoddol ymroddedig sy’n ei gefnogi drwy gydol ei gyfnod gyda’r sefydliad.